سکون گھر میں میسر نہ گھر کے باہر ہے

سکون گھر میں میسر نہ گھر کے باہر ہے

یہ کس گناہ کی پاداش اب مرے سر ہے

نہ فرش گل پہ نہ کانٹوں پہ میرا بستر ہے

حقیقتاً یہ مرے اپنے حوصلے پر ہے

خدا ہی چاہے تو ساحل نصیب ہو جائے

مری نگاہ میں چاروں طرف سمندر ہے

یوں ہی نہیں کوئی آئینہ حیرتی ہوگا

مجھے یقیں ہے کوئی آئنہ کے اندر ہے

کسے دکھائیں گریباں کی دھجیاں اے دوست

کہ جس نے چاک کیا ہے وہی رفوگر ہے

غریب لوگ ہمیں کیا غرض سیاست سے

ہمارے دل میں ہے جو کچھ وہی زباں پر ہے

یہاں بھی آ کے تمہارا خلوص کام آیا

تمہارے نام کی چرچا ظہورؔ گھر گھر ہے