sukun ki chhanw mein jalne ka majra hai ajib

sukūñ kī chhāñv meñ jalne kā mājrā hai ajiib

hamāre dil kā bhī logo mo.āmla hai ajiib

batā ai paikar-e-lamhāt kuchh huā hai ajiib

na raushnī na añdherā tirī qabā hai ajiib

tirī zamīñ to hai be-mehvarī kī samt ravāñ

tirā safar ho salāmat ki rāsta hai ajiib

kahīñ bhī jumbish-e-yak-lamha tak kā naam nahīñ

dayār-e-dil kā to is baar zalzala hai ajiib

koī to de mirī āñkhoñ ko niiñd kī sauġhāt

yahāñ to jāgtī rātoñ kā silsila hai ajiib

qarār-e-qalb bhī DhūñDeñ to kis liye DhūñDeñ

qarār-e-qalb se aage kā rāsta hai ajiib

najāt ab tirī mumkin nahīñ kahīñ bhī 'sho.aib'

hujūm-e-dard kā ab ke muhāsara hai ajiib

sukun ki chhanw mein jalne ka majra hai ajib

hamare dil ka bhi logo moamla hai ajib

bata ai paikar-e-lamhat kuchh hua hai ajib

na raushni na andhera teri qaba hai ajib

teri zamin to hai be-mehwari ki samt rawan

tera safar ho salamat ki rasta hai ajib

kahin bhi jumbish-e-yak-lamha tak ka nam nahin

dayar-e-dil ka to is bar zalzala hai ajib

koi to de meri aankhon ko nind ki saughat

yahan to jagti raaton ka silsila hai ajib

qarar-e-qalb bhi DhunDen to kis liye DhunDen

qarar-e-qalb se aage ka rasta hai ajib

najat ab teri mumkin nahin kahin bhi 'shoaib'

hujum-e-dard ka ab ke muhasara hai ajib