sukun kisi ko mayassar nahin chaman mein abhi

sukūñ kisī ko mayassar nahīñ chaman meñ abhī

bahut se ḳhaar haiñ phūloñ ke pairahan meñ abhī

nasīm-e-sub.h ne gul to bahut khilā.e haiñ

magar bahār na aa.ī mire chaman meñ abhī

mujhe ye naaz ki ashkoñ ko pī rahā huuñ maiñ

unheñ ye ġham kī añdherā hai anjuman meñ abhī

chaman pe hai ye karam bū-e-ġhuncha-o-gul kā

ki irtibāt hai baaqī lab-o-dahan meñ abhī

ye kis ḳhayāl ke aate hī chhaT ga.ī 'nashtar'

jo tīrgī thī ḳhayāloñ kī anjuman meñ abhī

sukun kisi ko mayassar nahin chaman mein abhi

bahut se KHar hain phulon ke pairahan mein abhi

nasim-e-subh ne gul to bahut khilae hain

magar bahaar na aai mere chaman mein abhi

mujhe ye naz ki ashkon ko pi raha hun main

unhen ye gham ki andhera hai anjuman mein abhi

chaman pe hai ye karam bu-e-ghuncha-o-gul ka

ki irtibaat hai baqi lab-o-dahan mein abhi

ye kis KHayal ke aate hi chhaT gai 'nashtar'

jo tirgi thi KHayalon ki anjuman mein abhi