سکوں مانگے نہ راحت مانگتی ہے

سکوں مانگے نہ راحت مانگتی ہے

یہ چاہت تو عبادت مانگتی ہے

اسے رسم روایت سے غرض کیا

محبت تو محبت مانگتی ہے

روایت توڑنا مشکل بہت ہے

ہر اک جدت بغاوت مانگتی ہے

ہماری آنے والی نسل ہر دم

بزرگوں سے نصیحت مانگتی ہے

وہ اک نادان بچی کر کے سجدہ

خدا سے روز جنت مانگتی ہے

زمیں اور آسماں کم پڑ رہے ہیں

تمنا اور وسعت مانگتی ہے

ہماری پیاس شیشے توڑ بیٹھی

یہ پگلی کتنی شدت مانگتی ہے

محبت زندگی دیتی ہے لیکن

محبت ہی قیامت مانگتی ہے

غزل کی آبرو اب مجھ سے رنکیؔ

زمانے بھر میں شہرت مانگتی ہے