sukun nasib hai par apne ghar ki had tak hai

sukūñ nasīb hai par apne ghar kī had tak hai

koī to hai ki jo dīvār-o-dar kī had tak hai

maiñ chāhtā huuñ ki duniyā meñ kuchh baḌā kar jā.ūñ

mirā zamāna magar ḳhair-o-shar kī had tak hai

abhī vo chhat pe khaḌe ho ke haath señkte haiñ

abhī ye aag faqat mere ghar kī had tak hai

koī tulūa huā aur dhuñd chhāne lagī

mujhe lagā thā añdherā sahar kī had tak hai

huzūr dūsrī manzil pe rahnā bhī dukh hai

ki ghar kā peḌ bhī mujh par samar kī had tak hai

mire paḌos ke ūñche chaubāroñ vaale log

mujhe batāte haiñ duniyā nazar kī had tak hai

sukun nasib hai par apne ghar ki had tak hai

koi to hai ki jo diwar-o-dar ki had tak hai

main chahta hun ki duniya mein kuchh baDa kar jaun

mera zamana magar KHair-o-shar ki had tak hai

abhi wo chhat pe khaDe ho ke hath senkte hain

abhi ye aag faqat mere ghar ki had tak hai

koi tulua hua aur dhund chhane lagi

mujhe laga tha andhera sahar ki had tak hai

huzur dusri manzil pe rahna bhi dukh hai

ki ghar ka peD bhi mujh par samar ki had tak hai

mere paDos ke unche chaubaron wale log

mujhe batate hain duniya nazar ki had tak hai