سکوں سے رات بتاتے تھے موج کرتے تھے

سکوں سے رات بتاتے تھے موج کرتے تھے

جب اس کے خواب نہ آتے تھے موج کرتے تھے

فضول آ گئے صحرا سے شہر میں ہم لوگ

وہاں پہ خاک اڑاتے تھے موج کرتے تھے

گھرے ہوئے ہیں زمانے کے اب عذابوں سے

یہ لوگ ناچتے گاتے تھے موج کرتے تھے

کسی کے رنگ میں ڈھلنے سے ہو گئے بے رنگ

ہم اپنے رنگ بناتے تھے موج کرتے تھے

امیر شہر کے پکوان سے ہوئے بیمار

نمک سے روٹیاں کھاتے تھے موج کرتے تھے

ہم اس کی بزم میں تاخیر سے گئے ہر بار

جو لوگ وقت پہ آتے تھے موج کرتے تھے