sukut-e-husn mein bhi ek afsana nazar aaya

sukūt-e-husn meñ bhī ek afsāna nazar aaya

vahī zikr-e-vafā lekin ba-unvān-e-digar aaya

sar-e-mizhgāñ lahū misl-e-charāġh-e-rah-guzar aaya

baḌī mushkil se is duniyā ko andāz-e-sahar aaya

nigāh-e-nāz meñ behad fusūn-e-parda-dārī hai

ki us mahfil se jo aaya nihāyat be-ḳhabar aaya

ise ḳhūn-e-shahīdān-e-vafā kā mo.ajiza kahiye

zamāne tak shu.ūr-e-maslak-e-shām-o-sahar aaya

mizāj-e-ishq kī ḳhātir abhī duniyā nahīñ badlī

tirā jalva ba-qaid-e-zauq har lahza nazar aaya

kahīñ mauj-e-sitam shāmil na ho bād-e-bahārī meñ

hameñ larzīda larzīda gulistāñ bhī nazar aaya

koī samjhe to ye me.arāj hai dard-e-rifāqat kī

mire hamrāh manzil tak ġhubār-e-rahguzar aaya

ġham-e-dil kī nigahbānī bahut dushvār hai 'saifī'

ki har taaza nafas ehsās-e-dil se bā-ḳhabar aaya

sukut-e-husn mein bhi ek afsana nazar aaya

wahi zikr-e-wafa lekin ba-unwan-e-digar aaya

sar-e-mizhgan lahu misl-e-charagh-e-rah-guzar aaya

baDi mushkil se is duniya ko andaz-e-sahar aaya

nigah-e-naz mein behad fusun-e-parda-dari hai

ki us mahfil se jo aaya nihayat be-KHabar aaya

ise KHun-e-shahidan-e-wafa ka moajiza kahiye

zamane tak shuur-e-maslak-e-sham-o-sahar aaya

mizaj-e-ishq ki KHatir abhi duniya nahin badli

tera jalwa ba-qaid-e-zauq har lahza nazar aaya

kahin mauj-e-sitam shamil na ho baad-e-bahaari mein

hamein larzida larzida gulistan bhi nazar aaya

koi samjhe to ye mearaj hai dard-e-rifaqat ki

mere hamrah manzil tak ghubar-e-rahguzar aaya

gham-e-dil ki nigahbani bahut dushwar hai 'saifi'

ki har taza nafas ehsas-e-dil se ba-KHabar aaya