sukut-e-‘ishq mein Duba hua wo ek laDka

sukūt-e-‘ishq meñ Duubā huā vo ik laḌkā

charāġh-e-hijr jalātā huā vo ik laḌkā

pata karo use sahrā meñ kaun le aayā

har ik baat pe hañstā huā vo ik laḌkā

zarūratoñ ke taqāzoñ meñ TūTtā bantā

bahut qarīb se dekhā huā vo ik laḌkā

na jaane kaun sī duniyā meñ kho gayā āḳhir

tirī galī se guzartā huā vo ik laḌkā

mohabbatoñ ke hasīñ ḳhvāb le ke āñkhoñ meñ

‘bashīr-badr' ko paḌhtā huā vo ik laḌkā

qalam laboñ meñ dabā.e hue vo ik laḌkī

usī kā 'aks banātā huā vo ik laḌkā

talāsh kījiye 'nādir' purāne album meñ

kisī kī chaah meñ bhaTkā huā vo ik laḌkā

sukut-e-‘ishq mein Duba hua wo ek laDka

charagh-e-hijr jalata hua wo ek laDka

pata karo use sahra mein kaun le aaya

har ek baat pe hansta hua wo ek laDka

zaruraton ke taqazon mein TuTta banta

bahut qarib se dekha hua wo ek laDka

na jaane kaun si duniya mein kho gaya aaKHir

teri gali se guzarta hua wo ek laDka

mohabbaton ke hasin KHwab le ke aankhon mein

‘bashir-badr' ko paDhta hua wo ek laDka

qalam labon mein dabae hue wo ek laDki

usi ka 'aks banata hua wo ek laDka

talash kijiye 'nadir' purane album mein

kisi ki chah mein bhaTka hua wo ek laDka