sukut-e-lab ko mere arz-e-haal hi samjho

sukūt-e-lab ko mire arz-e-hāl hī samjho

mirī anā-e-ḳhafī ko savāl hī samjho

vo rū-ba-rū haiñ mire dil magar ye kahtā hai

ḳhayāl-e-husn ko husn-e-ḳhayāl hī samjho

rafāqatoñ ke qarīne badalte rahte haiñ

so karb-e-hijr ko lutf-e-visāl hī samjho

taḌap rahe haiñ jo yuuñ ham sadā-e-sāz ke saath

use kuchh aur nahīñ vajd-o-hāl hī samjho

mire hunar ko rahā bazm-e-kam-nazar se gurez

use bhī mere hunar kā kamāl hī samjho

havā-e-sub.h-e-chaman aur ek baar agar

guzar ga.ī to hameñ pā.emāl hī samjho

diloñ ke zaḳhm chhupe haiñ lahū kī chādar meñ

tumheñ ġharaz nahīñ tum indimāl hī samjho

husūl-e-kaif ko mai-ḳhāna-e-hayāt meñ 'lais'

shikast-e-jām se pahle muhāl hī samjho

sukut-e-lab ko mere arz-e-haal hi samjho

meri ana-e-KHafi ko sawal hi samjho

wo ru-ba-ru hain mere dil magar ye kahta hai

KHayal-e-husn ko husn-e-KHayal hi samjho

rafaqaton ke qarine badalte rahte hain

so karb-e-hijr ko lutf-e-visal hi samjho

taDap rahe hain jo yun hum sada-e-saz ke sath

use kuchh aur nahin wajd-o-haal hi samjho

mere hunar ko raha bazm-e-kam-nazar se gurez

use bhi mere hunar ka kamal hi samjho

hawa-e-subh-e-chaman aur ek bar agar

guzar gai to hamein paemal hi samjho

dilon ke zaKHm chhupe hain lahu ki chadar mein

tumhein gharaz nahin tum indimal hi samjho

husul-e-kaif ko mai-KHana-e-hayat mein 'lais'

shikast-e-jam se pahle muhaal hi samjho