sukut-e-lab ko shikasta-dili samajhte hain

sukūt-e-lab ko shikasta-dilī samajhte haiñ

ye kam-nigāh fareb-e-ḳhudī samajhte haiñ

jo tīrgī meñ bhaTakte haiñ rahnumā haiñ vo

jo raushnī hai use tīrgī samajhte haiñ

nizām-e-kohna kā paḌhte haiñ vo qasīda phir

jo raqs-e-maut ko bhī zindagī samajhte haiñ

tabassum-e-lab-e-jānāñ se khelne vaale

ġham-e-vafā ko ġham-e-zindagī samajhte haiñ

sajā.e jaate haiñ dāman ko aaj kāñToñ se

ḳhayāl-e-gul ko matā-e-kalī samajhte haiñ

junūñ kī daad bhulā deñge kyā ḳhirad ke ġhulām

jo zinda-dil haiñ use zindagī samajhte haiñ

ye zarf apnā hai 'nāzir' ki is zamāne ne

jo ġham diyā hai use ham ḳhushī samajhte haiñ

sukut-e-lab ko shikasta-dili samajhte hain

ye kam-nigah fareb-e-KHudi samajhte hain

jo tirgi mein bhaTakte hain rahnuma hain wo

jo raushni hai use tirgi samajhte hain

nizam-e-kohna ka paDhte hain wo qasida phir

jo raqs-e-maut ko bhi zindagi samajhte hain

tabassum-e-lab-e-jaanan se khelne wale

gham-e-wafa ko gham-e-zindagi samajhte hain

sajae jate hain daman ko aaj kanTon se

KHayal-e-gul ko mata-e-kali samajhte hain

junun ki dad bhula denge kya KHirad ke ghulam

jo zinda-dil hain use zindagi samajhte hain

ye zarf apna hai 'nazir' ki is zamane ne

jo gham diya hai use hum KHushi samajhte hain