sukut-e-shab mein teri yaad dil mein yun aai

sukūt-e-shab meñ tirī yaad dil meñ yuuñ aa.ī

bajā rahā ho koī duur jaise shahnā.ī

ḳhud apne ġham se lipaT kar 'shahāb' so jaao

thakī thakī sī shab-e-hijr ḳhatm par aa.ī

kisī ko ranjish-e-be-jā bhī ab nahīñ ham se

khanak ke TuuT gayā sāġhar-e-shanāsā.ī

bhulāne vaale mire din guzar hī jā.eñge

magar Dase na tujhe shām-e-ġham kī tanhā.ī

na koī va.ada na koī yaqīn thā phir bhī

tumhārī raah meñ shab bhar nigāh dauḌā.ī

kuchh is tarah se uThīñ merī samt vo nazreñ

ki jaise jaag uThe sub.h le ke añgḌā.ī

udāsiyoñ ne kahā ab yahāñ nahīñ koī

kabhī nazar jo tire bām-o-dar se Takrā.ī

'shahāb' hī kā fasāna na sun liyā ho kahīñ

falak pe kyuuñ ye sitāroñ kī aañkh bhar aa.ī

sukut-e-shab mein teri yaad dil mein yun aai

baja raha ho koi dur jaise shahnai

KHud apne gham se lipaT kar 'shahab' so jao

thaki thaki si shab-e-hijr KHatm par aai

kisi ko ranjish-e-be-ja bhi ab nahin hum se

khanak ke TuT gaya saghar-e-shanasai

bhulane wale mere din guzar hi jaenge

magar Dase na tujhe sham-e-gham ki tanhai

na koi wada na koi yaqin tha phir bhi

tumhaari rah mein shab bhar nigah dauDai

kuchh is tarah se uThin meri samt wo nazren

ki jaise jag uThe subh le ke angDai

udasiyon ne kaha ab yahan nahin koi

kabhi nazar jo tere baam-o-dar se Takrai

'shahab' hi ka fasana na sun liya ho kahin

falak pe kyun ye sitaron ki aankh bhar aai