سکوت شب ترے سینے سے وہ صدا نکلے

سکوت شب ترے سینے سے وہ صدا نکلے

کہ قدسیوں کے لبوں سے بھی ربنا نکلے

کرشمہ ساز کبھی صبح کی سفیدی میں

در شفق سے کوئی رنگ تو نیا نکلے

کچھ اس لئے بھی تجھے ایک ٹک میں تکتا ہوں

ترے بدن سے محبت کا زاویہ نکلے

مجال کیا کہ کوئی نقش ہو بیاں میں ترے

تری زباں سے تو ہر لفظ ہی بجا نکلے

یہ عشق حسن سے کب تک فریب کھائے گا

کہ بچ نکلنے کا کوئی تو راستہ نکلے

اے گرد باد سفر تجھ پہ جاں نثار کہ ہم

کہاں سے نکلے تھے اور اب کہاں پہ آ نکلے

تو اب نوازؔ کی باتوں پہ کان مت دھریو

کہ وجد و حال میں کیا جانے منہ سے کیا نکلے