sukut-e-shab tere sine se wo sada nikle

sukūt-e-shab tire siine se vo sadā nikle

ki qudsiyoñ ke laboñ se bhī rabbanā nikle

karishma-sāz kabhī sub.h kī safedī meñ

dar-e-shafaq se koī rang to nayā nikle

kuchh is liye bhī tujhe ek Tuk maiñ taktā huuñ

tire badan se mohabbat kā zāviya nikle

majāl kyā ki koī naqsh ho bayāñ meñ tire

tirī zabāñ se to har lafz hī bajā nikle

ye 'ishq husn se kab tak fareb khā.egā

ki bach nikalne kā koī to rāsta nikle

ai gard-bād-e-safar tujh pe jaañ nisār ki ham

kahāñ se nikle the aur ab kahāñ pe aa nikle

tū ab 'navāz' kī bātoñ pe kaan mat dhariyo

ki vajd-o-hāl meñ kyā jaane muñh se kyā nikle

sukut-e-shab tere sine se wo sada nikle

ki qudsiyon ke labon se bhi rabbana nikle

karishma-saz kabhi subh ki safedi mein

dar-e-shafaq se koi rang to naya nikle

kuchh is liye bhi tujhe ek Tuk main takta hun

tere badan se mohabbat ka zawiya nikle

majal kya ki koi naqsh ho bayan mein tere

teri zaban se to har lafz hi baja nikle

ye 'ishq husn se kab tak fareb khaega

ki bach nikalne ka koi to rasta nikle

ai gard-baad-e-safar tujh pe jaan nisar ki hum

kahan se nikle the aur ab kahan pe aa nikle

tu ab 'nawaz' ki baaton pe kan mat dhariyo

ki wajd-o-haal mein kya jaane munh se kya nikle