sukut toDega aankhon ko aabju karega

sukūt toḌegā āñkhoñ ko aabjū karegā

jo kal 'adū ne kiyā thā vo aaj tū karegā

maiñ haath rakhtā huuñ sar par sadā yatīmoñ ke

yahī ‘amal mujhe duniyā meñ surḳh-rū karegā

ḳhud apne haath se apnā vujūd chaak kiyā

yahī umiid ki tū aa.egā rafū karegā

tavīl 'arse ke baa'd aaj ye ghaḌī aa.ī

ki terā 'ishq mire dil se guftugū karegā

kisī ke haq meñ du'ā kar ke dekhiye sāhab

farishta aap kī sohbat kī aarzū karegā

maiñ us nigāh kā mehvar nahīñ huā ab tak

vo mujh ko sūrat-e-ḳhāshāk kū-ba-kū karegā

tirī hathelī ko dulhan koī banā na sakā

ye kaam dekhnā ab ke mirā lahū karegā

kisī kā hijr muassar hai is qadar 'āfāq'

ki chāñd baam pe aane kī justujū karegā

sukut toDega aankhon ko aabju karega

jo kal 'adu ne kiya tha wo aaj tu karega

main hath rakhta hun sar par sada yatimon ke

yahi ‘amal mujhe duniya mein surKH-ru karega

KHud apne hath se apna wujud chaak kiya

yahi umid ki tu aaega rafu karega

tawil 'arse ke ba'd aaj ye ghaDi aai

ki tera 'ishq mere dil se guftugu karega

kisi ke haq mein du'a kar ke dekhiye sahab

farishta aap ki sohbat ki aarzu karega

main us nigah ka mehwar nahin hua ab tak

wo mujh ko surat-e-KHashak ku-ba-ku karega

teri hatheli ko dulhan koi bana na saka

ye kaam dekhna ab ke mera lahu karega

kisi ka hijr muassar hai is qadar 'afaq'

ki chand baam pe aane ki justuju karega