sulagta dasht bahut jis ke intizar mein tha

sulagtā dasht bahut jis ke intizār meñ thā

vo abr uljhā huā bahr-e-be-kanār meñ thā

har ek samt havā ke aziim lashkar the

aur ik charāġh hī maidān-e-kār-zār meñ thā

khiñchī huī thī mire gird vāhimoñ kī fasīl

maiñ qaid apne banā.e hue hisār meñ thā

mire shajar pe magar phuul phal nahīñ aa.e

vo yuuñ to phalte daraḳhtoñ hī kī qatār meñ thā

koī kamīñ thā na mehmān aane vaalā thā

kivāḌ jaane khulā kis ke intizār meñ thā

zamīñ kī pyaas kā bādal ko thā ḳhayāl bahut

magar barasnā samandar ke iḳhtiyār meñ thā

khulī fazā thī magar paañv meñ thiiñ zanjīreñ

ajiib kashmakash-e-jabr-o-iḳhtiyār meñ thā

sulagta dasht bahut jis ke intizar mein tha

wo abr uljha hua bahr-e-be-kanar mein tha

har ek samt hawa ke azim lashkar the

aur ek charagh hi maidan-e-kar-zar mein tha

khinchi hui thi mere gird wahimon ki fasil

main qaid apne banae hue hisar mein tha

mere shajar pe magar phul phal nahin aae

wo yun to phalte daraKHton hi ki qatar mein tha

koi kamin tha na mehman aane wala tha

kiwaD jaane khula kis ke intizar mein tha

zamin ki pyas ka baadal ko tha KHayal bahut

magar barasna samandar ke iKHtiyar mein tha

khuli faza thi magar panw mein thin zanjiren

ajib kashmakash-e-jabr-o-iKHtiyar mein tha