sulagte sochte ghulte rahe shabab ke din

sulagte sochte ghulte rahe shabāb ke din

guzar ga.e haiñ tire hijr meñ azaab ke din

ḳhud apne aap se laḌ kar kabhī zamāne se

basar hue haiñ ka.ī is tarah janāb ke din

ġhurūr itnā bhī joban pe mat karo dilbar

ye jaan lo haiñ bahut muḳhtasar gulāb ke din

mire rafīq mujhe rafta rafta chhoḌ ga.e

hamesha to nahīñ rahte haiñ āb-o-tāb ke din

agar gunāh ne piirī meñ lā ke chhoḌ diyā

ziyāñ-nasīb samajh lad ga.e savāb ke din

ḳhudā se 'kaif' ye baḳhshish kā hai savāl ke vo

binā hisāb mujhe baḳhsh de hisāb ke din

sulagte sochte ghulte rahe shabab ke din

guzar gae hain tere hijr mein azab ke din

KHud apne aap se laD kar kabhi zamane se

basar hue hain kai is tarah janab ke din

ghurur itna bhi joban pe mat karo dilbar

ye jaan lo hain bahut muKHtasar gulab ke din

mere rafiq mujhe rafta rafta chhoD gae

hamesha to nahin rahte hain aab-o-tab ke din

agar gunah ne piri mein la ke chhoD diya

ziyan-nasib samajh lad gae sawab ke din

KHuda se 'kaif' ye baKHshish ka hai sawal ke wo

bina hisab mujhe baKHsh de hisab ke din