sulagti nind ke girdab se nikal aaya

sulagtī niiñd ke girdāb se nikal aayā

maiñ aaj ya.anī kisī ḳhvāb se nikal aayā

vahāñ bhī koī nahīñ thā ḳharāb hāloñ kā

maiñ ho ke mimbar-o-mehrāb se nikal aayā

atā-e-shān-e-karīmī ajiib hotī hai

kinārā ḳhud hī tah-e-āb se nikal aayā

hazār sadiyoñ pe bhārī thā ek lamha-e-lams

vo raat jab had-e-ādāb se nikal aayā

vo dekh maut ke sāhil kī ret chamkī hai

maiñ zindagī tire sailāb se nikal aayā

jise misāl meñ sunte rahe haiñ ham 'anjum'

vo par bhī bāzū-e-surḳhāb se nikal aayā

sulagti nind ke girdab se nikal aaya

main aaj yani kisi KHwab se nikal aaya

wahan bhi koi nahin tha KHarab haalon ka

main ho ke mimbar-o-mehrab se nikal aaya

ata-e-shan-e-karimi ajib hoti hai

kinara KHud hi tah-e-ab se nikal aaya

hazar sadiyon pe bhaari tha ek lamha-e-lams

wo raat jab had-e-adab se nikal aaya

wo dekh maut ke sahil ki ret chamki hai

main zindagi tere sailab se nikal aaya

jise misal mein sunte rahe hain hum 'anjum'

wo par bhi bazu-e-surKHab se nikal aaya