sulagti ret ki qismat mein dariya likh diya jae

sulagtī ret kī qismat meñ dariyā likh diyā jaa.e

mujhe in jhiil sī āñkhoñ meñ rahnā likh diyā jaa.e

tirī zulfoñ ke saa.e meñ agar jī luuñ maiñ pal-do-pal

na ho phir ġham jo mere naam sahrā likh diyā jaa.e

mirā aur us kā milnā ab to nā-mumkin sā lagtā hai

use sūraj mujhe shab kā sitārā likh diyā jaa.e

akelā maiñ hī kyuuñ āḳhir sajā.ūñ palkoñ pe taare

kabhī us kī bhī palkoñ pe sitārā likh diyā jaa.e

mujhe chhoḌā hai taptī dhuup meñ jis shaḳhs ne tanhā

use bhī ġham kī duniyā meñ akelā likh diyā jaa.e

jo shab-ḳhūñ mārtā hai merī bastī ke ujāloñ par

muqaddar us ke bhī ghar kā añdherā likh diyā jaa.e

kahīñ bujhtī hai dil kī pyaas ik do ghūñT se 'anzar'

maiñ sūraj huuñ mire hisse meñ dariyā likh diyā jaa.e

sulagti ret ki qismat mein dariya likh diya jae

mujhe in jhil si aankhon mein rahna likh diya jae

teri zulfon ke sae mein agar ji lun main pal-do-pal

na ho phir gham jo mere nam sahra likh diya jae

mera aur us ka milna ab to na-mumkin sa lagta hai

use suraj mujhe shab ka sitara likh diya jae

akela main hi kyun aaKHir sajaun palkon pe tare

kabhi us ki bhi palkon pe sitara likh diya jae

mujhe chhoDa hai tapti dhup mein jis shaKHs ne tanha

use bhi gham ki duniya mein akela likh diya jae

jo shab-KHun marta hai meri basti ke ujalon par

muqaddar us ke bhi ghar ka andhera likh diya jae

kahin bujhti hai dil ki pyas ek do ghunT se 'anzar'

main suraj hun mere hisse mein dariya likh diya jae