sulagti ret ko dariya nahin kaha maine

sulagtī ret ko dariyā nahīñ kahā maiñ ne

ġhazal kahī hai qasīda nahīñ kahā maiñ ne

huzūr mohtaram izzat-ma.āb ālī-janāb

ye saarā jhuuT hai aisā nahīñ kahā maiñ ne

jo bevafā thā usī kī taraf ishāra kiyā

kināyatan ise duniyā nahīñ kahā maiñ ne

jo hū-ba-hū tirī tasvīr ban ke aa jaa.e

jo sach kahūñ to kuchh aisā nahīñ kahā maiñ ne

chaḌhā.e us pe nahīñ maiñ ne san.atoñ ke ġhilāf

ki sach ko sher meñ bāñdhā nahīñ kahā maiñ ne

jo kahnā chāhtā huuñ vo abhī kahā hī nahīñ

vagarna kahne ko kyā kyā nahīñ kahā maiñ ne

sulagti ret ko dariya nahin kaha main ne

ghazal kahi hai qasida nahin kaha main ne

huzur mohtaram izzat-maab aali-janab

ye sara jhuT hai aisa nahin kaha main ne

jo bewafa tha usi ki taraf ishaara kiya

kinayatan ise duniya nahin kaha main ne

jo hu-ba-hu teri taswir ban ke aa jae

jo sach kahun to kuchh aisa nahin kaha main ne

chaDhae us pe nahin main ne sanaton ke ghilaf

ki sach ko sher mein bandha nahin kaha main ne

jo kahna chahta hun wo abhi kaha hi nahin

wagarna kahne ko kya kya nahin kaha main ne