sulagti ret pe chalna paDe KHuda na kare

sulagtī ret pe chalnā paḌe ḳhudā na kare

mirī tarah tujhe qismat barahna-pā na kare

phir is ke baad mirī zindagī vafā na kare

maiñ tujh ko bhuul ke zinda rahūñ ḳhudā na kare

ik ek pal hai aziyyat nafas nafas hai azaab

jo mujh ko dekh le jiine kā hausla na kare

jise majāl-e-takallum na ho vo chup baiThe

baḌoñ kī baat sune koī tabsira na kare

chhue baġhair charāġhoñ ko vo guzar jaa.e

havā se koī bhī aisā mutālba na kare

ye nasl lafz-e-mohabbat se āshnā hī nahīñ

koī kisī se bhī tahzīb kā gila na kare

ḳhabar ye hai ki udhar chal rahī hai garm havā

koī parinda bhī hijrat kā faisla na kare

sulūk jis kā ho sab ke liye shajar jaisā

kisī bhī umr meñ bachchoñ kā aasrā na kare

ye mashvara hai mirā 'ramz' e'tirāz nahīñ

parā.ī aag bujhāne meñ ḳhud jalā na kare

sulagti ret pe chalna paDe KHuda na kare

meri tarah tujhe qismat barahna-pa na kare

phir is ke baad meri zindagi wafa na kare

main tujh ko bhul ke zinda rahun KHuda na kare

ek ek pal hai aziyyat nafas nafas hai azab

jo mujh ko dekh le jine ka hausla na kare

jise majal-e-takallum na ho wo chup baiThe

baDon ki baat sune koi tabsira na kare

chhue baghair charaghon ko wo guzar jae

hawa se koi bhi aisa mutalba na kare

ye nasl lafz-e-mohabbat se aashna hi nahin

koi kisi se bhi tahzib ka gila na kare

KHabar ye hai ki udhar chal rahi hai garm hawa

koi parinda bhi hijrat ka faisla na kare

suluk jis ka ho sab ke liye shajar jaisa

kisi bhi umr mein bachchon ka aasra na kare

ye mashwara hai mera 'ramz' e'tiraaz nahin

parai aag bujhane mein KHud jala na kare