sun sun ke chup hain tana-e-aghyar kya karen

sun sun ke chup haiñ ta.ana-e-aġhyār kyā kareñ

majbūr haiñ vafā ke parastār kyā kareñ

ro.eñ lahū na dīda-e-ḳhūñ-bār kyā kareñ

majrūh jab ho ishq kā pindār kyā kareñ

iz.hār-e-haq ke vāste mansūr ab kahāñ

bātil-parast hausla-e-dār kyā kareñ

ho jaa.e shash-jihat na kahīñ ye dhuāñ dhuāñ

josh-e-junūñ meñ āh-e-sharar-bār kyā kareñ

saaqī ye tishnagī sar-e-mai-ḳhāna tā-ba-kai

jām-o-subū na toḌeñ to mai-ḳhvār kyā kareñ

jab āstīn-e-shaiḳh-e-haram ġharq-e-bāda ho

log ehtirām-e-jubba-o-dastār kyā kareñ

ham 'faḳhr' sarkashoñ ke na aage kabhī jhuke

rakhte haiñ ik tabī.at-e-ḳhuddār kyā kareñ

sun sun ke chup hain tana-e-aghyar kya karen

majbur hain wafa ke parastar kya karen

roen lahu na dida-e-KHun-bar kya karen

majruh jab ho ishq ka pindar kya karen

izhaar-e-haq ke waste mansur ab kahan

baatil-parast hausla-e-dar kya karen

ho jae shash-jihat na kahin ye dhuan dhuan

josh-e-junun mein aah-e-sharar-bar kya karen

saqi ye tishnagi sar-e-mai-KHana ta-ba-kai

jam-o-subu na toDen to mai-KHwar kya karen

jab aastin-e-shaiKH-e-haram gharq-e-baada ho

log ehtiram-e-jubba-o-dastar kya karen

hum 'faKHr' sarkashon ke na aage kabhi jhuke

rakhte hain ek tabiat-e-KHuddar kya karen