سن سناتا ہوں اک کہانی سن

سن سناتا ہوں اک کہانی سن

دے گئی جل مجھے جوانی سن

ہے ردا تیرے پاس تو دے دے

سر برہنہ ہے زندگانی سن

موسم گل میں دیکھ جلتا چمن

عندلیبوں کی نوحہ خوانی سن

شہر کا حال ان دنوں کیا ہے

میرے ہر زخم کی زبانی سن

سنسنی خیز سنسناہٹ میں

سن ہواؤں کی خوش بیانی سن

خار سے گل سے سبز موسم کی

داستان شرر فشانی سن

آتشیں کہہ رہا ہے اپنے کو

چڑھتے دریا کی لن ترانی سن

زندگی بن گئی ہے سنیاسن

یہ خبر ہے بہت پرانی سن

تبصرہ عہد پہ سناتا ہے

میری چھت سے ٹپکتا پانی سن