suna hai ek jahan is jahan se pahle tha

sunā hai ek jahāñ is jahāñ se pahle thā

ajab jahāñ thā agar āsmāñ se pahle thā

agarche sajde haiñ mamnūn āstāñ lekin

mazāq-e-sajda mujhe āstāñ se pahle thā

tumhīñ kaho kabhī tum ne sunā thā ḳhush ho kar

tumhārā zikr jo mere bayāñ se pahle thā

qubūl-e-ḳhātir-e-ushshāq ho ke rah na gayā

tirā fasāna mirī dāstāñ se pahle thā

na shauq-e-rahzanī-e-dil na zauq-e-ġhārat-e-jāñ

ajab tarīq mire kārvāñ se pahle thā

bahār thī na ḳhizāñ barq thī na thā sayyād

chaman na thā jo mire āshiyāñ se pahle thā

isī jahān ko inkār thā qayāmat kā

yahī jahān jo ik naujavāñ se pahle thā

kuchh is tarah hai mujhe dard-e-ishq kā ehsās

ye jaise mujh ko yūñhī jism-o-jāñ se pahle thā

vo naaz ban ke phir āḳhir niyāz ho ke rahā

unheñ ġhurūr jo merī fuġhāñ se pahle thā

zahe vo bazm ki hotā hai roz ye mahsūs

ki jaise koī ta.alluq yahāñ se pahle thā

hunūz dil meñ usī shadd-o-mad se hai 'bismil'

vo hausla jo mujhe imtihāñ se pahle thā

suna hai ek jahan is jahan se pahle tha

ajab jahan tha agar aasman se pahle tha

agarche sajde hain mamnun aastan lekin

mazaq-e-sajda mujhe aastan se pahle tha

tumhin kaho kabhi tum ne suna tha KHush ho kar

tumhaara zikr jo mere bayan se pahle tha

qubul-e-KHatir-e-ushshaq ho ke rah na gaya

tera fasana meri dastan se pahle tha

na shauq-e-rahzani-e-dil na zauq-e-ghaarat-e-jaan

ajab tariq mere karwan se pahle tha

bahaar thi na KHizan barq thi na tha sayyaad

chaman na tha jo mere aashiyan se pahle tha

isi jahan ko inkar tha qayamat ka

yahi jahan jo ek naujawan se pahle tha

kuchh is tarah hai mujhe dard-e-ishq ka ehsas

ye jaise mujh ko yunhi jism-o-jaan se pahle tha

wo naz ban ke phir aaKHir niyaz ho ke raha

unhen ghurur jo meri fughan se pahle tha

zahe wo bazm ki hota hai roz ye mahsus

ki jaise koi talluq yahan se pahle tha

hunuz dil mein usi shadd-o-mad se hai 'bismil'

wo hausla jo mujhe imtihan se pahle tha