suna hai ki un se mulaqat hogi

sunā hai ki un se mulāqāt hogī

agar ho ga.ī to baḌī baat hogī

nigāhoñ se sharh-e-hikāyāt hogī

zabāñ chup rahegī magar baat hogī

mire ashk jis shab ke dāman meñ hoñge

yaqīnan vo tāroñ bharī raat hogī

samajhtī hai shaam o sahar jis ko duniyā

tire zulf o aariz kī ḳhairāt hogī

na sāvan hī barsā na bhādoñ hī barsā

bahut shor sunte the barsāt hogī

mohabbat bahut be-mazā hogī jis din

zabāñ be-niyāz-e-shikāyāt hogī

vahāñ qalb kī raushnī saath degī

jahāñ din na hogā faqat raat hogī

'nazīr' aao ro leñ gale mil ke ham tum

ḳhudā jaane phir kab mulāqāt hogī

suna hai ki un se mulaqat hogi

agar ho gai to baDi baat hogi

nigahon se sharh-e-hikayat hogi

zaban chup rahegi magar baat hogi

mere ashk jis shab ke daman mein honge

yaqinan wo taron bhari raat hogi

samajhti hai sham o sahar jis ko duniya

tere zulf o aariz ki KHairaat hogi

na sawan hi barsa na bhadon hi barsa

bahut shor sunte the barsat hogi

mohabbat bahut be-maza hogi jis din

zaban be-niyaz-e-shikayat hogi

wahan qalb ki raushni sath degi

jahan din na hoga faqat raat hogi

'nazir' aao ro len gale mil ke hum tum

KHuda jaane phir kab mulaqat hogi