suna kar haal qismat aazma kar lauT aae hain

sunā kar haal qismat aazmā kar lauT aa.e haiñ

unheñ kuchh aur begāna banā kar lauT aa.e haiñ

phir ik TuuTā huā rishta phir ik ujḌī huī duniyā

phir ik dilchasp afsāna sunā kar lauT aa.e haiñ

fareb-e-ārzū ab to na de ai marg-e-mayūsī

ham ummīdoñ kī ik duniyā luTā kar lauT aa.e haiñ

ḳhudā shāhid hai ab to un sā bhī koī nahīñ miltā

ba-zom-e-ḳhvesh un ko aazmā kar lauT aa.e haiñ

bichhe jaate haiñ yā rab kyuuñ kisī kāfir ke qadmoñ meñ

vo sajde jo dar-e-ka.aba pe jā kar lauT aa.e haiñ

suna kar haal qismat aazma kar lauT aae hain

unhen kuchh aur begana bana kar lauT aae hain

phir ek TuTa hua rishta phir ek ujDi hui duniya

phir ek dilchasp afsana suna kar lauT aae hain

fareb-e-arzu ab to na de ai marg-e-mayusi

hum ummidon ki ek duniya luTa kar lauT aae hain

KHuda shahid hai ab to un sa bhi koi nahin milta

ba-zom-e-KHwesh un ko aazma kar lauT aae hain

bichhe jate hain ya rab kyun kisi kafir ke qadmon mein

wo sajde jo dar-e-kaba pe ja kar lauT aae hain