suna ki KHub hai uske dayar ka mausam

sunā ki ḳhuub hai us ke dayār kā mausam

diloñ pe chhāne lagā phir ḳhumār kā mausam

kabhī kabhī to badan ko pata nahīñ chaltā

ki bāġh-e-rūh meñ kab aayā pyaar kā mausam

maiñ us gulāb ko nārāz kar nahīñ saktā

bhale hī ruuTh ke jaa.e bahār kā mausam

ye ḳhauf dil meñ ubhartā hai dard kī sūrat

badal na jaa.e kahīñ e'tibār kā mausam

maiñ ḳhud bhī milne ko bechain huuñ ye jab se sunā

mirī talāsh meñ hai intizār kā mausam

tamām āb-o-havā meñ gulāl bikhrā hai

ki rañg laayā hai us ke nikhār kā mausam

khile hue haiñ umīdoñ ke phuul dil meñ magar

guzar na jaa.e kahīñ intizār kā mausam

baḌe maze se abhī tak guzar rahe haiñ din

isī tarah rahe qaa.em ḳhumār kā mausam

yahāñ kabhī bhī ḳhizāñ kā guzar nahīñ hogā

yahāñ hamesha rahegā bahār kā mausam

sukūn-e-qalb mayassar ho ḳhvāb puure hoñ

kabhī to aa.e dil-e-be-qarār kā mausam

kisī tarah bhī na inkār kī hai gunjā.ish

ki hai uruuj pe qaul-o-qarār kā mausam

vo achchhe-achchhoñ ko ḳhātir maiñ ab na laatā hai

ki in dinoñ to hai us ke nikhār kā mausam

suna ki KHub hai us ke dayar ka mausam

dilon pe chhane laga phir KHumar ka mausam

kabhi kabhi to badan ko pata nahin chalta

ki bagh-e-ruh mein kab aaya pyar ka mausam

main us gulab ko naraaz kar nahin sakta

bhale hi ruTh ke jae bahaar ka mausam

ye KHauf dil mein ubharta hai dard ki surat

badal na jae kahin e'tibar ka mausam

main KHud bhi milne ko bechain hun ye jab se suna

meri talash mein hai intizar ka mausam

tamam aab-o-hawa mein gulal bikhra hai

ki rang laya hai us ke nikhaar ka mausam

khile hue hain umidon ke phul dil mein magar

guzar na jae kahin intizar ka mausam

baDe maze se abhi tak guzar rahe hain din

isi tarah rahe qaem KHumar ka mausam

yahan kabhi bhi KHizan ka guzar nahin hoga

yahan hamesha rahega bahaar ka mausam

sukun-e-qalb mayassar ho KHwab pure hon

kabhi to aae dil-e-be-qarar ka mausam

kisi tarah bhi na inkar ki hai gunjaish

ki hai uruj pe qaul-o-qarar ka mausam

wo achchhe-achchhon ko KHatir main ab na lata hai

ki in dinon to hai us ke nikhaar ka mausam