suna to hai ki kabhi be-niyaz-e-gham thi hayat

sunā to hai ki kabhī be-niyāz-e-ġham thī hayāt

dilā.ī yaad nigāhoñ ne terī kab kī baat

zamāñ makāñ hai faqat madd-o-jazr-e-josh-e-hayāt

bas ek mauj kī haiñ jhalkiyāñ qarār-o-sabāt

hayāt ban ga.ī thī jin meñ ek ḳhvāb-e-hayāt

are davām-o-abad the vahī to kuchh lamhāt

hayāt-e-dozaḳhiyāñ bhī tamām mub.ham hai

azaab bhī na mayassar huā kahāñ kī najāt

tirī nigāh kī sub.heñ nigāh kī shāmeñ

harīm-e-rāz ye duniyā jahāñ na dan haiñ na raat

bas ik sharāb-e-kuhan ke karishme haiñ saaqī

na.e zamāne na.ī mastiyāñ na.ī barsāt

kisī pe zulm burā hai magar ye kahtā huuñ

ki aadmī pe ho ehsān aadmī haihāt

sukūt-e-rāz vahī hai jo dāstāñ ban jaa.e

nigāh-e-nāz vahī jo nikāle baat meñ baat

ġham-o-nishāt mohabbat kī chhoḌ de lālach

har ik se uThte nahīñ ye azaab ye barkāt

tamām aks hai duniyā tamām aks adam

kahāñ tak ā.ina-dar-ā.ina hayāt-o-mamāt

fazā meñ mahkī huī chāñdnī ki naġhma-e-rāz

ki utreñ sīna-e-shā.ir meñ jis tarah naġhmāt

bas ek rāz-e-tasalsul bas ik tasalsul-e-rāz

kahāñ pahuñch ke huī ḳhatm bahs-e-zāt-o-sifāt

chamakte dard khile chehre muskurāte ashk

sajā.ī jā.egī ab tarz-e-nau se bazm-e-hayāt

jise sab ahl-e-jahāñ zindagī samajhte haiñ

kabhī kabhī to mile aisī zindagī se najāt

agar ḳhudā bhī mile to na le ki o nādāñ

hai tū hī ka.aba-e-dīñ tū hī qibla-e-hājāt

tamām ḳhastagī-o-māñdgī hai ālam-e-hijr

thake thake se ye taare thakī thakī sī ye raat

tirī ġhazal to na.ī ruuh phūñk detī hai

'firāq' der se chhūTī huī hai nabz-e-hayāt

suna to hai ki kabhi be-niyaz-e-gham thi hayat

dilai yaad nigahon ne teri kab ki baat

zaman makan hai faqat madd-o-jazr-e-josh-e-hayat

bas ek mauj ki hain jhalkiyan qarar-o-sabaat

hayat ban gai thi jin mein ek KHwab-e-hayat

are dawam-o-abad the wahi to kuchh lamhat

hayat-e-dozaKHiyan bhi tamam mubham hai

azab bhi na mayassar hua kahan ki najat

teri nigah ki subhen nigah ki shamen

harim-e-raaz ye duniya jahan na dan hain na raat

bas ek sharab-e-kuhan ke karishme hain saqi

nae zamane nai mastiyan nai barsat

kisi pe zulm bura hai magar ye kahta hun

ki aadmi pe ho ehsan aadmi haihat

sukut-e-raaz wahi hai jo dastan ban jae

nigah-e-naz wahi jo nikale baat mein baat

gham-o-nishat mohabbat ki chhoD de lalach

har ek se uThte nahin ye azab ye barkat

tamam aks hai duniya tamam aks adam

kahan tak aaina-dar-aina hayat-o-mamat

faza mein mahki hui chandni ki naghma-e-raaz

ki utren sina-e-shair mein jis tarah naghmat

bas ek raaz-e-tasalsul bas ek tasalsul-e-raaz

kahan pahunch ke hui KHatm bahs-e-zat-o-sifat

chamakte dard khile chehre muskuraate ashk

sajai jaegi ab tarz-e-nau se bazm-e-hayat

jise sab ahl-e-jahan zindagi samajhte hain

kabhi kabhi to mile aisi zindagi se najat

agar KHuda bhi mile to na le ki o nadan

hai tu hi kaba-e-din tu hi qibla-e-hajat

tamam KHastagi-o-mandgi hai aalam-e-hijr

thake thake se ye tare thaki thaki si ye raat

teri ghazal to nai ruh phunk deti hai

'firaq' der se chhuTi hui hai nabz-e-hayat