sunaun tumhein zindagi ki kahani

sunā.ūñ tumheñ zindagī kī kahānī

ġham-e-jāvedānī ġham-e-jāvedānī

na samjhā vo asrār-e-hastī na samjhā

yahāñ jis ne ġham kī haqīqat na jaanī

mohabbat meñ ik dars-e-ibrat banegī

mirī nā-murādī mirī saḳht-jānī

mohabbat kī duniyā luTī jā rahī hai

javānī aur us par kisī kī javānī

tasavvur meñ haiñ ahd-e-māzī kī bāteñ

na vo sarḳhushī hai na vo sargirānī

na jaane kahāñ tak ye duniyā sunegī

kisī kā fasāna kisī kī zabānī

mujhe 'hosh' ye dars ġham ne diyā hai

ki hastī kā dhokā hai ik shādmānī

sunaun tumhein zindagi ki kahani

gham-e-jawedani gham-e-jawedani

na samjha wo asrar-e-hasti na samjha

yahan jis ne gham ki haqiqat na jaani

mohabbat mein ek dars-e-ibrat banegi

meri na-muradi meri saKHt-jaani

mohabbat ki duniya luTi ja rahi hai

jawani aur us par kisi ki jawani

tasawwur mein hain ahd-e-mazi ki baaten

na wo sarKHushi hai na wo sargirani

na jaane kahan tak ye duniya sunegi

kisi ka fasana kisi ki zabani

mujhe 'hosh' ye dars gham ne diya hai

ki hasti ka dhoka hai ek shadmani