سنے گئے ہیں رفو گر یہ گفتگو کرتے

سنے گئے ہیں رفو گر یہ گفتگو کرتے

ہم اس جلے ہوئے دامن میں کیا رفو کرتے

اگر ہم ان سے غم دل کی آرزو کرتے

وہ لا کے آئینۂ حشر روبرو کرتے

ادا شناس تھا ساقی تو پھر تجاہل کیوں

اٹھے ہیں بزم سے کتنے سبو سبو کرتے

کھڑے ہوئے ہیں خودی کے بسیط صحرا میں

نکلتے اس سے تو پھر تیری جستجو کرتے

کبھی نصیب نہ ہوتی یہ درد کی لذت

اگر خراب ہم اشکوں کی آبرو کرتے

شمیمؔ کاش اسی حال میں گزر جاتی

وہ ہم کو ڈھونڈتے ہم ان کی جستجو کرتے