سنے تو سارا جہاں جرأت نوا ہی نہیں

سنے تو سارا جہاں جرأت نوا ہی نہیں

فلک کو چیرنے والی کوئی صدا ہی نہیں

طبیب عشق کے دعوے تمام جھوٹے ہیں

کسی مریض پر اب تک اثر ہوا ہی نہیں

اسی کے حکم سے ہوتے ہیں دور رنج و الم

تو یعنی خالق کونین کی رضا ہی نہیں

ہم اس کی ایک نظر سے فقط سنور جائیں

مگر وہ خانہ خرابوں کو دیکھتا ہی نہیں

شکایتیں تو تعلق کے دم پہ ہوتی ہیں

پھر ان سے کیسا گلہ جن سے واسطہ ہی نہیں

خوشی کے وقت سبھی دے گئے مبارک باد

شدید غم میں کوئی شخص پوچھتا ہی نہیں

لگی ہے ضرب یقیناً بہت شدید اس پر

یہ شیشہ اتنی سہولت سے ٹوٹتا ہی نہیں