sunen bahaar ki rangin-bayaniyan kya kya

suneñ bahār kī rañgīñ-bayāniyāñ kyā kyā

kahīñ tabassum-e-gul ne kahāniyāñ kyā kyā

dayā javāb na kuchh muskurā ke rah ga.e phuul

zabān-e-ḳhār ne kiiñ bad-zabāniyāñ kyā kyā

baḌhā na nāqa-e-lailā baġhair nāla-e-qais

hunar dikhātī rahīñ sārbāniyāñ kyā kyā

mizāj-e-sañg na pighlā ki thā na soz-e-kalīm

asā paTaktī rahīñ qahar-māniyāñ kyā kyā

zabān-e-aql pe kuchh hai zabān-e-ishq pe kuchh

tire sukūt se niklīñ kahāniyāñ kyā kyā

na detā husn agar dil ko ishq kā sho.ala

ḳhud apnī aag meñ jaltīñ javāniyāñ kyā kyā

mizāj-e-ishq ne pakḌā na e'tibār kā rañg

sharīk-e-vahm rahīñ ḳhush-gumāniyāñ kyā kyā

jaras bhī chup rahā TuuTī na kārvāñ kī bhī niiñd

sukūt-e-dasht ne kiiñ nauha-ḳhvāniyāñ kyā kyā

pukārtī hai 'razā' gard-e-kārvāñ lekin

banī haiñ bār-e-safar sargirāniyāñ kyā kyā

sunen bahaar ki rangin-bayaniyan kya kya

kahin tabassum-e-gul ne kahaniyan kya kya

daya jawab na kuchh muskura ke rah gae phul

zaban-e-KHar ne kin bad-zabaniyan kya kya

baDha na naqa-e-laila baghair nala-e-qais

hunar dikhati rahin sarbaniyan kya kya

mizaj-e-sang na pighla ki tha na soz-e-kalim

asa paTakti rahin qahar-maniyan kya kya

zaban-e-aql pe kuchh hai zaban-e-ishq pe kuchh

tere sukut se niklin kahaniyan kya kya

na deta husn agar dil ko ishq ka shoala

KHud apni aag mein jaltin jawaniyan kya kya

mizaj-e-ishq ne pakDa na e'tibar ka rang

sharik-e-wahm rahin KHush-gumaniyan kya kya

jaras bhi chup raha TuTi na karwan ki bhi nind

sukut-e-dasht ne kin nauha-KHwaniyan kya kya

pukarti hai 'raza' gard-e-karwan lekin

bani hain bar-e-safar sargiraniyan kya kya