suni hai raushni ke qatl ki jab se KHabar maine

sunī hai raushnī ke qatl kī jab se ḳhabar maiñ ne

charāġhoñ kī taraf dekhā nahīñ hai lauT kar maiñ ne

farāz-e-dār se apnoñ ke chehre ḳhud hī pahchāne

faqīh-e-shahr ko jaanā nahīñ hai mo'tabar maiñ ne

bhalā sūraj kī tarf kaun dekhe kis meñ himmat hai

tire chehre pe Daalī hī nahīñ ab tak nazar maiñ ne

yaqīnan āñdhiyoñ ne aa liyā kūñjoñ kī Dāroñ ko

ki ḳhūñ-ālūda dekhe haiñ fazā meñ bāl-o-par maiñ ne

tumhāre ba.ad maiñ ne phir kisī ko bhī nahīñ dekhā

nahīñ hone diyā ālūda dāmān-e-nazar maiñ ne

hazāroñ ārzūeñ rah ga.iiñ gard-e-safar ho kar

sajā rakkhī hai palkoñ pe vahī gard-e-safar maiñ ne

dam-e-ruḳhsat mirī palkoñ pe do qatre the ashkoñ ke

kiyā hai zindagānī ke safar ko muḳhtasar maiñ ne

maiñ apne ghar meñ ḳhud apnoñ se baazī haar baiThā huuñ

abhī sīkhā nahīñ apnoñ meñ rahne kā hunar maiñ ne

'surūr-ambālvī' apne hī dil meñ us ko paayā hai

jise ik umr tak āvāz dī hai dar-ba-dar maiñ ne

suni hai raushni ke qatl ki jab se KHabar main ne

charaghon ki taraf dekha nahin hai lauT kar main ne

faraaz-e-dar se apnon ke chehre KHud hi pahchane

faqih-e-shahr ko jaana nahin hai mo'tabar main ne

bhala suraj ki tarf kaun dekhe kis mein himmat hai

tere chehre pe Dali hi nahin ab tak nazar main ne

yaqinan aandhiyon ne aa liya kunjon ki Daron ko

ki KHun-aluda dekhe hain faza mein baal-o-par main ne

tumhaare baad main ne phir kisi ko bhi nahin dekha

nahin hone diya aaluda daman-e-nazar main ne

hazaron aarzuen rah gain gard-e-safar ho kar

saja rakkhi hai palkon pe wahi gard-e-safar main ne

dam-e-ruKHsat meri palkon pe do qatre the ashkon ke

kiya hai zindagani ke safar ko muKHtasar main ne

main apne ghar mein KHud apnon se bazi haar baiTha hun

abhi sikha nahin apnon mein rahne ka hunar main ne

'surur-ambaalwi' apne hi dil mein us ko paya hai

jise ek umr tak aawaz di hai dar-ba-dar main ne