suni to usne ghairon se hua go bad-guman humse

sunī to us ne ġhairoñ se huā go bad-gumāñ ham se

bahar-sūrat rahī behtar hamārī dāstāñ ham se

zabāñ par aa.egī kyā paas nāmūs-e-mohabbat se

nahīñ dohrā.ī jaatī dil meñ apnī dāstāñ ham se

chune the chaar tinke ek din sehn-e-gulistāñ meñ

rahā tā-zindagī barham mizāj-e-bāġhbāñ ham se

duhā.ī hai ġham-e-majbūrī-e-imkāñ duhā.ī hai

ki phirtī haiñ dam-e-rehlat hamārī putliyāñ ham se

subuk-sar rah chuke haiñ ham bhī duniyā meñ kabhī lekin

ye zikr us vaqt kā hai aap jab the sargirāñ ham se

qafas hī ho gayā tūl-e-asīrī se nasheman jab

na chhūTe āshiyāñ se ham na chhūTā āshiyāñ ham se

zamāna dūsrī karvaT badaltā bhī to kyā hotā

badal jaatī na uftād-e-zamīn-o-āsmāñ ham se

bahār aane se pahle ik pareshāñ ḳhvāb dekhā thā

ki jaise fasl-e-gul meñ chhuT rahā hai āshiyāñ ham se

zamāna sāziyāñ qurbāñ ma.aal andeshiyāñ sadqe

vo sunñe aaj baiThe haiñ hamārī dāstāñ ham se

madad ai lazzat-e-zauq-e-asīrī ab ye hasrat hai

qafas vaale badal lete hamārā āshiyāñ ham se

tasavvur meñ khiñchā naqsha hai un ke rū-e-rañgīñ kā

ba-zāhir parda-e-dil meñ haiñ 'afqar' vo nihāñ ham se

suni to us ne ghairon se hua go bad-guman hum se

bahar-surat rahi behtar hamari dastan hum se

zaban par aaegi kya pas namus-e-mohabbat se

nahin dohrai jati dil mein apni dastan hum se

chune the chaar tinke ek din sehn-e-gulistan mein

raha ta-zindagi barham mizaj-e-baghban hum se

duhai hai gham-e-majburi-e-imkan duhai hai

ki phirti hain dam-e-rehlat hamari putliyan hum se

subuk-sar rah chuke hain hum bhi duniya mein kabhi lekin

ye zikr us waqt ka hai aap jab the sargiran hum se

qafas hi ho gaya tul-e-asiri se nasheman jab

na chhuTe aashiyan se hum na chhuTa aashiyan hum se

zamana dusri karwaT badalta bhi to kya hota

badal jati na uftad-e-zamin-o-asman hum se

bahaar aane se pahle ek pareshan KHwab dekha tha

ki jaise fasl-e-gul mein chhuT raha hai aashiyan hum se

zamana saziyan qurban maal andeshiyan sadqe

wo sunne aaj baiThe hain hamari dastan hum se

madad ai lazzat-e-zauq-e-asiri ab ye hasrat hai

qafas wale badal lete hamara aashiyan hum se

tasawwur mein khincha naqsha hai un ke ru-e-rangin ka

ba-zahir parda-e-dil mein hain 'afqar' wo nihan hum se