suno to KHub hai Tuk kan dhar mera suKHan pyare

suno to ḳhuub hai Tuk kaan dhar merā suḳhan pyāre

ki āshiq par na honā is qadar bhī dil kaThan pyāre

kidhar ho be-ḳhabar ho kyā magar ahvāl siiñ mere

udhar dekho ai zālim lā-ubālī man-haran pyāre

na kar āzurda-ḳhātir bulbul-e-betāb kuuñ hargiz

ġhanīmat buujh do din kī bahār ai man-haran pyāre

phañsā hai mujh sarī kā said aa kar daam meñ tere

kiyā tū ne magar kuchh sehr ai jaadū nayan pyāre

taġhāful mat karo ai nau-bahār-e-gulshan-e-ḳhūbī

tumhāre bin nipaT be-āb hai dil kā chaman pyāre

mire dil kī kalī murjhā rahī hai sarsar-e-ġham señ

karo Tuk muskurā kar baat ai shīrīñ-dahan pyāre

'sirāj' ab sho.ala-e-ulfat meñ jiyūñ parvāna jaltā hai

na jānūñ tujh satī is kuuñ lagī hai kyā lagan pyāre

suno to KHub hai Tuk kan dhar mera suKHan pyare

ki aashiq par na hona is qadar bhi dil kaThan pyare

kidhar ho be-KHabar ho kya magar ahwal sin mere

udhar dekho ai zalim la-ubaali man-haran pyare

na kar aazurda-KHatir bulbul-e-betab kun hargiz

ghanimat bujh do din ki bahaar ai man-haran pyare

phansa hai mujh sari ka said aa kar dam mein tere

kiya tu ne magar kuchh sehr ai jadu nayan pyare

taghaful mat karo ai nau-bahaar-e-gulshan-e-KHubi

tumhaare bin nipaT be-ab hai dil ka chaman pyare

mere dil ki kali murjha rahi hai sarsar-e-gham sen

karo Tuk muskura kar baat ai shirin-dahan pyare

'siraj' ab shoala-e-ulfat mein jiyun parwana jalta hai

na jaanun tujh sati is kun lagi hai kya lagan pyare