sunoge tum bhi meri dastan kabhi na kabhi

sunoge tum bhī mirī dāstāñ kabhī na kabhī

asar dikhā.egā dard-e-nihāñ kabhī na kabhī

kabhī to ātish-e-namrūd sard bhī hogī

qarār pā.egā qalb-e-tapāñ kabhī na kabhī

ye aaj gardish-e-shām-o-sahar batātī hai

nazar bachā.egā ḳhud āsmāñ kabhī na kabhī

kabhī to gauhar-e-nāyāb haath aa.egā

milegā rūh-e-ḳhudī kā nishāñ kabhī na kabhī

jamūd-e-sehr-e-tamannā meñ rah nahīñ saktā

faroġh pā.egā azm-e-javāñ kabhī na kabhī

azaañ bilāl kī gūñjī hai regzāroñ meñ

sunegā dil kī sadā ye jahāñ kabhī na kabhī

'azīz' terī mohabbat bhī rañg lā.egī

tamām hogā ġham-e-bekarāñ kabhī na kabhī

sunoge tum bhi meri dastan kabhi na kabhi

asar dikhaega dard-e-nihan kabhi na kabhi

kabhi to aatish-e-namrud sard bhi hogi

qarar paega qalb-e-tapan kabhi na kabhi

ye aaj gardish-e-sham-o-sahar batati hai

nazar bachaega KHud aasman kabhi na kabhi

kabhi to gauhar-e-nayab hath aaega

milega ruh-e-KHudi ka nishan kabhi na kabhi

jamud-e-sehr-e-tamanna mein rah nahin sakta

farogh paega azm-e-jawan kabhi na kabhi

azan bilal ki gunji hai regzaron mein

sunega dil ki sada ye jahan kabhi na kabhi

'aziz' teri mohabbat bhi rang laegi

tamam hoga gham-e-bekaran kabhi na kabhi