سنتا جو ہے کوئی مرے غنچہ دہن کی بات

سنتا جو ہے کوئی مرے غنچہ دہن کی بات

بھاتی نہیں ہے اس کو کسی گل بدن کی بات

ہر شخص کی زباں پہ ترا ذکر خیر ہے

خالی نہیں ہے تجھ سے کسی مرد و زن کی بات

غربت میں اپنا حال کہوں کیا میں دوستو

دل ٹوٹتا ہے سنتا ہوں جب میں وطن کی بات

دشت جنوں میں پھر ہمیں لے چل تو اے جنوں

پھر وحشیوں کے ساتھ ہو دیوانہ پن کی بات

جام شراب ناب تو بالائے طاق ہے

کرتی ہے مست ساقیٔ گل گوں بدن کی بات

وعدے وصال کے تو ہزاروں گزر گئے

اب کون مانے اس بت پیماں شکن کی بات

سنتے ہیں ان کی کاکل مشکیں کے وصف میں

ہم گوش دل سے اہل خطا و ختن کی بات