sunta raha jo aql ki mahjub ho gaya

suntā rahā jo aql kī mahjūb ho gayā

dil kī nazar se dekhā to mahbūb ho gayā

kartā rahā jo ishq meñ apnī anā kī baat

nazroñ se terī gir gayā ma.atūb ho gayā

jis ne kabhī savāl uThāyā yaqīn par

dil vo salīb-e-aql pe maslūb ho gayā

jis par chalā thā roz tirī samt be-sabab

rasta vo mere naam se mansūb ho gayā

yuuñ to savāl aql ne soche ka.ī magar

dil jalva-hā-e-husn se mar.ūb ho gayā

aisī havā chalī hai ki ab tere shahr meñ

mehr-o-vafā kā zikr bhī ma.ayūb ho gayā

had se baḌhī talab to phir ik roz yuuñ huā

tālib dayār-e-husn meñ matlūb ho gayā

dekhā jise bhī terā hī jalva lagā mujhe

har rang tere husn kā mandūb ho gayā

kartā rahā huuñ aql kī tarvīj umr bhar

phir shā.erī meñ bhī yahī uslūb ho gayā

dil ke muāmlāt pe ġhālib kabhī na thā

phir yuuñ huā ki aql se maġhlūb ho gayā

likhtā rahā hai aaj 'hidāyat' jo hāl-e-dil

qāsid ke haath aap hī maktūb ho gayā

sunta raha jo aql ki mahjub ho gaya

dil ki nazar se dekha to mahbub ho gaya

karta raha jo ishq mein apni ana ki baat

nazron se teri gir gaya matub ho gaya

jis ne kabhi sawal uThaya yaqin par

dil wo salib-e-aql pe maslub ho gaya

jis par chala tha roz teri samt be-sabab

rasta wo mere nam se mansub ho gaya

yun to sawal aql ne soche kai magar

dil jalwa-ha-e-husn se marub ho gaya

aisi hawa chali hai ki ab tere shahr mein

mehr-o-wafa ka zikr bhi mayub ho gaya

had se baDhi talab to phir ek roz yun hua

talib dayar-e-husn mein matlub ho gaya

dekha jise bhi tera hi jalwa laga mujhe

har rang tere husn ka mandub ho gaya

karta raha hun aql ki tarwij umr bhar

phir shaeri mein bhi yahi uslub ho gaya

dil ke muamlat pe ghaalib kabhi na tha

phir yun hua ki aql se maghlub ho gaya

likhta raha hai aaj 'hidayat' jo haal-e-dil

qasid ke hath aap hi maktub ho gaya