sunte hain ki is shab ka sawera nahin mumkin

sunte haiñ ki is shab kā saverā nahīñ mumkin

allāh agar chāhe to phir kyā nahīñ mumkin

is ḳhvāb ko tum āñkhoñ se girne nahīñ denā

vaise to kisī pal kā bharosa nahīñ mumkin

ḳhushbū mirī sāñsoñ meñ rifāqat kī bharī hai

ho ḳhatm kisī se mirā rishta nahīñ mumkin

vo zahr-e-ta'assub jo yahāñ ab bhī bahut hai

duniyā ke kisī kone meñ hogā nahīñ mumkin

pāmālī-e-bātil kī misāloñ se hai sābit

mā'dūm ho sachchā.ī kā rasta nahīñ mumkin

is hijr ke mausam kī tavālat se hai zāhir

ho mun'aqid-e-jashn-e-tamanna nahīñ mumkin

dam bhartā huuñ tahzīb kā maiñ gang-o-jaman kī

urdu na paḌhe merā hī bachcha nahīñ mumkin

sunte hain ki is shab ka sawera nahin mumkin

allah agar chahe to phir kya nahin mumkin

is KHwab ko tum aankhon se girne nahin dena

waise to kisi pal ka bharosa nahin mumkin

KHushbu meri sanson mein rifaqat ki bhari hai

ho KHatm kisi se mera rishta nahin mumkin

wo zahr-e-ta'assub jo yahan ab bhi bahut hai

duniya ke kisi kone mein hoga nahin mumkin

pamali-e-baatil ki misalon se hai sabit

ma'dum ho sachchai ka rasta nahin mumkin

is hijr ke mausam ki tawalat se hai zahir

ho mun'aqid-e-jashn-e-tamanna nahin mumkin

dam bharta hun tahzib ka main gang-o-jaman ki

urdu na paDhe mera hi bachcha nahin mumkin