supurd-e-gham-zadagan-e-saf-e-wafa hua main

supurd-e-ġham-zadagān-e-saf-e-vafā huā maiñ

paḌā huuñ umr kī dīvār se girā huā maiñ

ajiib soch sī aur us pe sochtā huā maiñ

ki TūTtā tirī hairat meñ aa.inā huā maiñ

kahīñ maiñ koh pe farhād aur dasht meñ qais

vajūd-e-ishq meñ huuñ ḳhud ko DhūñDhtā huā maiñ

jise bhī milnā hai mujh se vo intizār kare

na jaane kab palaT aa.uuñ kahīñ gayā huā maiñ

na mil sakā koī afsos vaqt par mujh ko

kisī ko mil na sakā vaqt se kaTā huā maiñ

tamām ham-nafasāñ qat.a kar ga.e manzil

bas ik musāfir-e-rah, rah gayā bachā huā maiñ

tamām umr yūñhī tarz-e-būd-o-bāsh rahī

kahīñ charāġh banā maiñ kahīñ havā huā maiñ

samajh na sahl zamāne kī gardishoñ ke ba.ad

huā maiñ ḳhud ko farāham mujhe atā huā maiñ

ajiib kaifiyat-e-intishār meñ huuñ ravāñ

ġhubār sā huuñ kisī ḳhaak se uḌā huā maiñ

supurd-e-gham-zadagan-e-saf-e-wafa hua main

paDa hun umr ki diwar se gira hua main

ajib soch si aur us pe sochta hua main

ki TuTta teri hairat mein aaina hua main

kahin main koh pe farhad aur dasht mein qais

wajud-e-ishq mein hun KHud ko DhunDhta hua main

jise bhi milna hai mujh se wo intizar kare

na jaane kab palaT aaun kahin gaya hua main

na mil saka koi afsos waqt par mujh ko

kisi ko mil na saka waqt se kaTa hua main

tamam ham-nafasan qata kar gae manzil

bas ek musafir-e-rah, rah gaya bacha hua main

tamam umr yunhi tarz-e-bud-o-bash rahi

kahin charagh bana main kahin hawa hua main

samajh na sahl zamane ki gardishon ke baad

hua main KHud ko faraham mujhe ata hua main

ajib kaifiyat-e-intishaar mein hun rawan

ghubar sa hun kisi KHak se uDa hua main