supurdagi ka walwala jamal mein nahin mila

supurdagī kā valvala jamāl meñ nahīñ milā

mujhe fusūn-e-be-ḳhudī visāl meñ nahīñ milā

jo aa.ine se kirchiyoñ ke darmiyāñ kā thā safar

shikast-e-zāt kī kisī misāl meñ nahīñ milā

alam-nasīb shaam meñ hai mehr-e-jāñ bujhā bujhā

nashāt-e-rañj bhī mujhe ma.aal meñ nahīñ milā

hazār yāsmīn mushk-bū huuñ tere qurb meñ

chaman kā aks tere ḳhadd-o-ḳhāl meñ nahīñ milā

vo sar-burīda chāñd bhī ġhurūb ho gayā magar

sitāra-e-sahar shab-e-zavāl meñ nahīñ milā

'nadīm' har qadam pe dard-e-be-amāñ kā dar khulā

sukūn is jahān-e-be-misāl meñ nahīñ milā

supurdagi ka walwala jamal mein nahin mila

mujhe fusun-e-be-KHudi visal mein nahin mila

jo aaine se kirchiyon ke darmiyan ka tha safar

shikast-e-zat ki kisi misal mein nahin mila

alam-nasib sham mein hai mehr-e-jaan bujha bujha

nashat-e-ranj bhi mujhe maal mein nahin mila

hazar yasmin mushk-bu hun tere qurb mein

chaman ka aks tere KHadd-o-KHal mein nahin mila

wo sar-burida chand bhi ghurub ho gaya magar

sitara-e-sahar shab-e-zawal mein nahin mila

'nadim' har qadam pe dard-e-be-aman ka dar khula

sukun is jahan-e-be-misal mein nahin mila