suragh-e-jada-o-manzil agar nahin milta

surāġh-e-jāda-o-manzil agar nahīñ miltā

hameñ kahīñ se javāz-e-safar nahīñ miltā

likheñ bhī dasht-navardī kā kuchh sabab to kyā

ba-juz ki qais ko lailā kā ghar nahīñ miltā

yahāñ fasīl-e-anā hā.il-e-masīhā.ī

vahāñ vo log jinheñ chārāgar nahīñ miltā

hazār kūcha-e-nik.hat meñ Dāliye Dere

magar vo phuul sar-e-rahguzar nahīñ miltā

phir ābiyārī-e-naḳhl-e-suḳhan nahīñ hotī

dil-e-hazīñ jo pas-e-chashm-e-tar nahīñ miltā

payām-e-shauq ko gītoñ meñ Dhāliye kyūñ-kar

mizāj-e-bād-e-subuk bhī agar nahīñ miltā

chalo ki phir se rafīqoñ kī bazm suunī hai

chalo ki sañg-e-malāmat ko sar nahīñ miltā

bashar-ba-nām-e-bashar to bahut haiñ duniyā meñ

bashar kī ḳhūbiyoñ vaalā magar nahīñ miltā

chalo phir us ke jharoke meñ phuul rakh aa.eñ

suḳhan koī jo agar mo'atabar nahīñ miltā

jahāñ meñ ek tumhī munfarid nahīñ 'ahmad'

yahāñ to koī bhī misl-e-digar nahīñ miltā

suragh-e-jada-o-manzil agar nahin milta

hamein kahin se jawaz-e-safar nahin milta

likhen bhi dasht-nawardi ka kuchh sabab to kya

ba-juz ki qais ko laila ka ghar nahin milta

yahan fasil-e-ana hail-e-masihai

wahan wo log jinhen chaaragar nahin milta

hazar kucha-e-nikhat mein Daliye Dere

magar wo phul sar-e-rahguzar nahin milta

phir aabiyari-e-naKHl-e-suKHan nahin hoti

dil-e-hazin jo pas-e-chashm-e-tar nahin milta

payam-e-shauq ko giton mein Dhaaliye kyun-kar

mizaj-e-baad-e-subuk bhi agar nahin milta

chalo ki phir se rafiqon ki bazm suni hai

chalo ki sang-e-malamat ko sar nahin milta

bashar-ba-nam-e-bashar to bahut hain duniya mein

bashar ki KHubiyon wala magar nahin milta

chalo phir us ke jharoke mein phul rakh aaen

suKHan koi jo agar mo'atabar nahin milta

jahan mein ek tumhi munfarid nahin 'ahmad'

yahan to koi bhi misl-e-digar nahin milta