surKH miTTi ko hawaon mein uDate hue hum

surḳh miTTī ko havāoñ meñ uḌāte hue ham

apnī aamad ke liye dasht sajāte hue ham

tujh tabassum kī mohabbat meñ hue haiñ barbād

muskurā.eñge tirā sog manāte hue ham

lā-makānī meñ hameñ chhoḌ ke jaatā huā tū

dasht-e-imkāñ se tujhe DhūñD ke laate hue ham

ai ḳhudā tū hī batā kaise kareñge inkār

ālam-e-hū meñ tujhe haath lagāte hue ham

raqs karte haiñ to miTTī to uḌegī pyāre

un ko lagte haiñ karāmāt dikhāte hue ham

apne hone se bhī inkār kiye jaate haiñ

tere hone kā yaqīñ ḳhud ko dilāte hue ham

ab ai vahshat meñ guñdhī ḳhaak rakhī chaak pe aur

apne hone ke liye chaak ghumāte hue ham

hālat-e-vajd ke hālāt batā baat ho to

hālat-e-hāl meñ tafrīh uThāte hue ham

ḳhāmushī shor haiñ aur shor balā kā 'sarmad'

tum ne dekhe haiñ kahīñ shor machāte hue ham

surKH miTTi ko hawaon mein uDate hue hum

apni aamad ke liye dasht sajate hue hum

tujh tabassum ki mohabbat mein hue hain barbaad

muskuraenge tera sog manate hue hum

la-makani mein hamein chhoD ke jata hua tu

dasht-e-imkan se tujhe DhunD ke late hue hum

ai KHuda tu hi bata kaise karenge inkar

aalam-e-hu mein tujhe hath lagate hue hum

raqs karte hain to miTTi to uDegi pyare

un ko lagte hain karamat dikhate hue hum

apne hone se bhi inkar kiye jate hain

tere hone ka yaqin KHud ko dilate hue hum

ab ai wahshat mein gundhi KHak rakhi chaak pe aur

apne hone ke liye chaak ghumate hue hum

haalat-e-wajd ke haalat bata baat ho to

haalat-e-haal mein tafrih uThate hue hum

KHamushi shor hain aur shor bala ka 'sarmad'

tum ne dekhe hain kahin shor machate hue hum