surKH suraj sham ka singhaar hai

surḳh sūraj shaam kā singhār hai

būḌhī āñkhoñ par dhuñdalkā baar hai

ek meñDak tajribe kī mez par

mushta.il kitnā hī ho be-kār hai

zehn par chādar dhueñ kī tan ga.ī

dhund meñ Duubā huā sansār hai

murta.ish lahroñ pe raqsāñ chāñdnī

merī sāñsoñ meñ ajab jhankār hai

vādiyoñ meñ surḳh phūloñ kī bahār

sabz āñkhoñ ke liye kohsār hai

sang-o-āhan isti.āre haiñ faqat

har taraf to ret kī dīvār hai

raat kyā ḳhvāboñ pe phir TuuTā azaab

aaj kyoñ har aadmī aḳhbār hai

surKH suraj sham ka singhaar hai

buDhi aankhon par dhundalka bar hai

ek meinDak tajribe ki mez par

mushtail kitna hi ho be-kar hai

zehn par chadar dhuen ki tan gai

dhund mein Duba hua sansar hai

murtaish lahron pe raqsan chandni

meri sanson mein ajab jhankar hai

wadiyon mein surKH phulon ki bahaar

sabz aankhon ke liye kohsar hai

sang-o-ahan istiare hain faqat

har taraf to ret ki diwar hai

raat kya KHwabon pe phir TuTa azab

aaj kyon har aadmi aKHbar hai