surmai sham ke KHwab oDhe hue koi aata raha koi jata raha

surma.ī shaam ke ḳhvāb oḌhe hue koī aatā rahā koī jaatā rahā

chilchilātī huī dhuup ke saa.e meñ ek būḌhā shajar muskurātā rahā

pattharoñ ke badan se lipaTtī huī kahkashāñ raqs kartī rahī raat bhar

niim uryāñ ḳhayālāt kā devtā apsarāoñ ko naġhme sunātā rahā

jab ki hosh-o-ḳhirad muzmahil ho ga.e dil añdheroñ kī bastī meñ gum ho gayā

sāñvlā ḳhvāb āñkhoñ kī dahlīz par ārzūoñ ke dīpak jalātā rahā

barf kī oḌhnī kohsāroñ ne lī naddiyoñ ne samundar ke lab chhū liye

jhiil se muttasil hans tanhā khaḌā hansnī ke liye giit gaatā rahā

ik ajab kashmakash zindagī bhar rahī vo na samjhā na maiñ us ko samjhā sakā

naqsh iz.hār kā ya.anī iqrār kā maiñ banātā rahā vo miTātā rahā

surmai sham ke KHwab oDhe hue koi aata raha koi jata raha

chilchilati hui dhup ke sae mein ek buDha shajar muskuraata raha

pattharon ke badan se lipaTti hui kahkashan raqs karti rahi raat bhar

nim uryan KHayalat ka dewta apsaraon ko naghme sunata raha

jab ki hosh-o-KHirad muzmahil ho gae dil andheron ki basti mein gum ho gaya

sanwla KHwab aankhon ki dahliz par aarzuon ke dipak jalata raha

barf ki oDhni kohsaron ne li naddiyon ne samundar ke lab chhu liye

jhil se muttasil hans tanha khaDa hansni ke liye git gata raha

ek ajab kashmakash zindagi bhar rahi wo na samjha na main us ko samjha saka

naqsh izhaar ka yani iqrar ka main banata raha wo miTata raha