سرور دل میں نہ آنکھوں میں خواب باقی ہے

سرور دل میں نہ آنکھوں میں خواب باقی ہے

شب فراق فقط اضطراب باقی ہے

ہزار رخ سے وہ پردہ اٹھا چکے ہیں مگر

ضیائے حسن کی اب بھی نقاب باقی ہے

خدا کے واسطے خست سے باز آ ساقی

انڈیل دے وہ جو خم میں شراب باقی ہے

تمہارے آتے ہی اچھا میں ہو گیا صاحب

نہ اب الم ہے نہ وہ اضطراب باقی ہے

شب فراق گئے میرے دل سے صبر و قرار

فقط غم دل خانہ خراب باقی ہے

لحد میں مجھ کو جگاتا ہے شور محشر کیوں

ابھی تو دل میں تمنائے خواب باقی ہے

ہزاروں ہو گئے پامال آسماں لیکن

ابھی یہ صابرؔ خانہ خراب باقی ہے