surur dil mein na aankhon mein KHwab baqi hai

surūr dil meñ na āñkhoñ meñ ḳhvāb baaqī hai

shab-e-firāq faqat iztirāb baaqī hai

hazār ruḳh se vo parda uThā chuke haiñ magar

ziyā-e-husn kī ab bhī naqāb baaqī hai

ḳhudā ke vāste ḳhissat se baaz aa saaqī

uñDel de vo jo ḳhum meñ sharāb baaqī hai

tumhāre aate hī achchhā maiñ ho gayā sāhab

na ab alam hai na vo iztirāb baaqī hai

shab-e-firāq ga.e mere dil se sabr-o-qarār

faqat ġham-e-dil-e-ḳhāna-ḳharāb baaqī hai

lahad meñ mujh ko jagātā hai shor-e-mahshar kyoñ

abhī to dil meñ tamannā-e-ḳhvāb baaqī hai

hazāroñ ho ga.e pāmāl āsmāñ lekin

abhī ye 'sābir'-e-ḳhāna-ḳharāb baaqī hai

surur dil mein na aankhon mein KHwab baqi hai

shab-e-firaq faqat iztirab baqi hai

hazar ruKH se wo parda uTha chuke hain magar

ziya-e-husn ki ab bhi naqab baqi hai

KHuda ke waste KHissat se baz aa saqi

unDel de wo jo KHum mein sharab baqi hai

tumhaare aate hi achchha main ho gaya sahab

na ab alam hai na wo iztirab baqi hai

shab-e-firaq gae mere dil se sabr-o-qarar

faqat gham-e-dil-e-KHana-KHarab baqi hai

lahad mein mujh ko jagata hai shor-e-mahshar kyon

abhi to dil mein tamanna-e-KHwab baqi hai

hazaron ho gae pamal aasman lekin

abhi ye 'sabir'-e-KHana-KHarab baqi hai