surur-e-ishq ki masti kahan hai sab ke liye

surūr-e-ishq kī mastī kahāñ hai sab ke liye

vo mujh meñ jazb huā aa ke ek shab ke liye

vo ek karb-e-hasīñ jo mujhe huā hai atā

na tere ruḳh ke liye hai na tere lab ke liye

kabhī to ulTe sar-e-ām vo naqāb apnī

taras rahe haiñ sabhī bāda-e-inab ke liye

tire visāl kī kab aarzū rahī dil ko

ki ham ne chāhā tujhe shauq-e-be-sabab ke liye

dil-e-hazīñ ki do-ālam nahīñ bahā jis kī

luTāyā maiñ ne ise terī ek chhab ke liye

vahī kiran jo sar-e-charḳh rah ga.ī tanhā

vo sog ban ga.ī tāroñ ke har tarab ke liye

'azīm' ishq-e-shah-e-do-sarā basā dil meñ

vahī ajam ke liye hai vahī arab ke liye

surur-e-ishq ki masti kahan hai sab ke liye

wo mujh mein jazb hua aa ke ek shab ke liye

wo ek karb-e-hasin jo mujhe hua hai ata

na tere ruKH ke liye hai na tere lab ke liye

kabhi to ulTe sar-e-am wo naqab apni

taras rahe hain sabhi baada-e-inab ke liye

tere visal ki kab aarzu rahi dil ko

ki hum ne chaha tujhe shauq-e-be-sabab ke liye

dil-e-hazin ki do-alam nahin baha jis ki

luTaya main ne ise teri ek chhab ke liye

wahi kiran jo sar-e-charKH rah gai tanha

wo sog ban gai taron ke har tarab ke liye

'azim' ishq-e-shah-e-do-sara basa dil mein

wahi ajam ke liye hai wahi arab ke liye