su-e-sahra hi mujhe le gai wahshat meri

sū-e-sahrā hī mujhe le ga.ī vahshat merī

tere dar par na huī aah sukūnat merī

hai masīhā.ī kā da.avā to jilā le aa kar

dam laboñ par hai zarā dekh to sūrat merī

maiñ ne bāzār-e-jahāñ meñ liyā saudā terā

husn-e-yūsuf pe fidā kyā ho tabī.at merī

bāġh-e-ālam meñ ġham-e-ishq kā phal rāhat hai

mojib-e-izz-o-karāmat huī zillat merī

huuñ maiñ āvārā-o-gum-gashta rah-e-maqsad kā

hazrat-e-ḳhizr se kyā hogī hidāyat merī

maiñ muqīm-e-dar-e-jānāñ huuñ vo tanhā dasht-navard

josh-e-ulfat meñ hai kyā qais se nisbat merī

uḌ ke pahuñchā sar-e-gardūñ pe bagūlā ban kar

ba.ad miTne ke buland utnī hai himmat merī

paas mere jo na aa.e koī shikva kyā hai

kartī hai be-kasī-e-ishq rifāqat merī

na.ara-zan ra.ad ke mānind ġham-e-hijr se huuñ

sifat-e-'barq' taḌapne kī hai aadat merī

su-e-sahra hi mujhe le gai wahshat meri

tere dar par na hui aah sukunat meri

hai masihai ka dawa to jila le aa kar

dam labon par hai zara dekh to surat meri

main ne bazar-e-jahan mein liya sauda tera

husn-e-yusuf pe fida kya ho tabiat meri

bagh-e-alam mein gham-e-ishq ka phal rahat hai

mojib-e-izz-o-karamat hui zillat meri

hun main aawara-o-gum-gashta rah-e-maqsad ka

hazrat-e-KHizr se kya hogi hidayat meri

main muqim-e-dar-e-jaanan hun wo tanha dasht-naward

josh-e-ulfat mein hai kya qais se nisbat meri

uD ke pahuncha sar-e-gardun pe bagula ban kar

baad miTne ke buland utni hai himmat meri

pas mere jo na aae koi shikwa kya hai

karti hai be-kasi-e-ishq rifaqat meri

nara-zan rad ke manind gham-e-hijr se hun

sifat-e-'barq' taDapne ki hai aadat meri