sukhe honTon par mere harf-e-dua hote hue

sūkhe hoñToñ par mire harf-e-duā hote hue

jang kaise haar jaa.eñ hausla hote hue

ho anal-haq kī sadā to paikar-e-mansūr ho

ham ne dekhā hai yahāñ banda ḳhudā hote hue

maiñ jhukā.ūñ sar sar-e-maqtal ḳhudā aisā na ho

sāmne dars-e-imām-e-karbalā hote hue

laaj rakhnā is uThe dast-e-du'ā kī ai ḳhudā

kashtiyāñ kyoñ Duub jaa.eñ nāḳhudā hote hue

maiñ samundar hī kī vus'at meñ bhaTaktā rah gayā

sāhiloñ kī ret par kuchh naqsh-e-pā hote hue

kyā kahūñ shauq-e-junūñ meñ chāk-dāmānī kā phir

raaz afshā ho gayā band-e-qabā hote hue

jaane kyā tā'bīr ho is ḳhvāb kī 'āsif-bilāl’

ik samundar dekhtā huuñ surḳh sā hote hue

sukhe honTon par mere harf-e-dua hote hue

jang kaise haar jaen hausla hote hue

ho anal-haq ki sada to paikar-e-mansur ho

hum ne dekha hai yahan banda KHuda hote hue

main jhukaun sar sar-e-maqtal KHuda aisa na ho

samne dars-e-imam-e-karbala hote hue

laj rakhna is uThe dast-e-du'a ki ai KHuda

kashtiyan kyon Dub jaen naKHuda hote hue

main samundar hi ki wus'at mein bhaTakta rah gaya

sahilon ki ret par kuchh naqsh-e-pa hote hue

kya kahun shauq-e-junun mein chaak-damani ka phir

raaz afsha ho gaya band-e-qaba hote hue

jaane kya ta'bir ho is KHwab ki 'asif-bilal’

ek samundar dekhta hun surKH sa hote hue