suna suna aangan hai aur baam-o-dar KHamosh

suunā suunā āñgan hai aur bām-o-dar ḳhāmosh

kis se guftugū kiije ho jo ghar kā ghar ḳhāmosh

sham.a kī tarah koī ġham-gusār kyā hogā

saath saath chaltī hai raat raat bhar ḳhāmosh

kuchh to maslahat hogī jo zabāñ nahīñ khultī

varna terī mahfil meñ ham aur is qadar ḳhāmosh

hai sukūt kā aalam kā.enāt par taarī

jab se ham idhar chup haiñ aur vo udhar ḳhāmosh

shahr-e-dil pe chhā.e haiñ dasht-e-ġham ke sannāTe

kitnī ārzūeñ haiñ sab kī sab magar ḳhāmosh

kārvāñ ko luuTā hai kis ne ye batā.e kaun

chashm-e-rāhzan hairāñ dast-e-rāhbar ḳhāmosh

jaur-hā-e-yārāñ ke silsile na baḌh jaa.eñ

aur bhī rahe 'ḳhāvar' tum yūñhī agar ḳhāmosh

suna suna aangan hai aur baam-o-dar KHamosh

kis se guftugu kije ho jo ghar ka ghar KHamosh

shama ki tarah koi gham-gusar kya hoga

sath sath chalti hai raat raat bhar KHamosh

kuchh to maslahat hogi jo zaban nahin khulti

warna teri mahfil mein hum aur is qadar KHamosh

hai sukut ka aalam kaenat par tari

jab se hum idhar chup hain aur wo udhar KHamosh

shahr-e-dil pe chhae hain dasht-e-gham ke sannaTe

kitni aarzuen hain sab ki sab magar KHamosh

karwan ko luTa hai kis ne ye batae kaun

chashm-e-rahzan hairan dast-e-rahbar KHamosh

jaur-ha-e-yaran ke silsile na baDh jaen

aur bhi rahe 'KHawar' tum yunhi agar KHamosh